रुपन्देहीको तिलोत्तमा उद्योग वाणिज्य संघले स्थानीय उत्पादन, व्यापार, कृषि, प्रविधि तथा पर्यटन प्रवद्र्धन गर्ने उद्देश्यले चौथो राष्ट्रिय औद्योगिक व्यापार मेला आयोजना गर्ने भएको छ । मेलामार्फत स्थानीय उद्यमशीलता, औद्योगिक विकास र आर्थिक गतिविधिलाई चलायमान बनाउने लक्ष्य लिइएको छ । संघले आइतबार पत्रकार सम्मेलन गरी आगामी मंसिर ३ गतेदेखि १६ गतेसम्म तिलोत्तमा नगरपालिका–४, मणिग्रामस्थित अस्थायी प्रदर्शनीस्थलमा मेला सञ्चालन गर्ने जनाएको छ । संघका अध्यक्ष ज्ञानेन्द्र कार्कीले मेलामा पाँच लाखभन्दा बढी दर्शक सहभागी हुने र १२ करोड रुपैयाँभन्दा बढीको कारोबार हुने अनुमान गरिएको बताउनुभयो ।
अध्यक्ष कार्कीको अनुसार मेलामा ३५० भन्दा बढी स्टल रहनेछन् । औद्योगिक तथा व्यावसायिक उत्पादन, कृषि, प्रविधि, पर्यटनलगायत विभिन्न क्षेत्रका सामग्री तथा सेवाको प्रदर्शनी गरिनेछ। होटलका लागि २० वटा स्टल रहनेछन् भने अटो तथा सूचना प्रविधिसम्बन्धी स्टल आवश्यकताअनुसार व्यवस्थापन गरिनेछ । ‘मेलालाई आकर्षक बनाउन बाल उद्यान, सांस्कृतिक कार्यक्रम तथा विभिन्न मनोरञ्जनात्मक गतिविधि सञ्चालन गरिनेछ । प्रवेशद्वारको सजावटमा लुम्बिनीको प्रवेशद्वार, पशुपतिनाथ र मुक्तिनाथका संरचनालाई प्रदर्शनात्मक रूपमा प्रस्तुत गरी नेपाली कला, संस्कृति र धार्मिक पर्यटनको झल्को दिने तयारी गरिएको छ’, उहाले बताउनुभयो ।
मेलामा जलवायु परिवर्तनसम्बन्धी चेतनामूलक सामग्री, तिलोत्तमाभित्र रहेका पर्यटकीय तथा धार्मिक स्थलका बारेमा जानकारी दिने प्रदर्शनी र नैतिक शिक्षासम्बन्धी सामग्रीसमेत राखिनेछ । यसले व्यापारिक गतिविधिसँगै सामाजिक चेतना र पर्यटन प्रवद्र्धनमा सहयोग पुग्ने अपेक्षा गरिएको उहाले बताउनुभयो ।
महोत्सवलाई केवल किनबेचको माध्यममा सीमित नराखी स्थानीय उत्पादनलाई राष्ट्रिय बजारसँग जोड्ने, साना तथा मझौला उद्यमलाई प्रोत्साहन गर्ने र रोजगारीका अवसर सिर्जना गर्ने उद्देश्य राखिएको कार्कीले बताउनुभयो । कृषि, उद्योग, व्यापार, उत्पादन, प्रविधि तथा पर्यटनलाई एकीकृत गर्दै तिलोत्तमाको आर्थिक पहिचानलाई राष्ट्रियस्तरमा स्थापित गर्ने लक्ष्यसमेत मेलाले लिएको छ ।
आयोजकले मेलालाई व्यवस्थित, सुरक्षित, मर्यादित र सहभागितामूलक बनाउन सरोकारवाला निकायसँग समन्वय गर्ने जनाएको छ । मेला सञ्चालनका क्रममा पारदर्शिता, सामाजिक उत्तरदायित्व, वातावरणीय सचेतना र सामूहिक सहभागितालाई प्राथमिकता दिइनेछ । मेलाको प्रवेश टिकट सामान्यतर्फ १५० रुपैयाँ र विशेष कार्यक्रम तथा कन्सर्टका लागि ४०० देखि ५०० रुपैयाँसम्म निर्धारण गरिएको छ । ज्येष्ठ नागरिकलाई परिचयपत्रका आधारमा निःशुल्क प्रवेशको व्यवस्था गरिएको छ । पाँच वर्षभन्दा कम उमेरका बालबालिका तथा परिचयपत्रका आधारमा फरक क्षमता भएका व्यक्तिले पनि निःशुल्क प्रवेश पाउनेछन् । नगरपालिकाको सिफारिसमा आउने २५ जनासम्मको समूहलाई निःशुल्क प्रवेशको व्यवस्था गरिएको छ भने विद्यार्थीलाई परिचयपत्रका आधारमा टिकटमा ५० प्रतिशत छुट दिइनेछ । आयोजकले मेला सफल बनाउन उद्योगी, व्यवसायी, सरकारी तथा वित्तीय संस्था, शैक्षिक संस्था, सामाजिक संघसंस्था र आम नागरिकलाई सहकार्यका लागि आग्रह गरेको छ । स्थानीय आर्थिक गतिविधि विस्तार, व्यापारिक सम्बन्ध सुदृढीकरण र पर्यटन प्रवद्र्धनका दृष्टिले मेला महत्वपूर्ण अवसर बन्ने अपेक्षा गरिएको कार्कीले बताउनुभयो । मेलामा दैनिक राष्ट्रिय तथा स्थानीय कलाकारको प्रस्तुती रहने छ भने स्वदेशी उत्पादनको बजारीकरण गरिने छ ।
