काठमाण्डौ, १५ कार्तिक । मौसममा क्रमिक सुधार हुन थालेको छ । आइतबार बिहान तराई क्षेत्र विशेष गरी पश्चिम र मध्य तराईमा बाक्लो हुस्सु÷कुहिरो लागेको थियो । मौसम पूर्वानुमान महाशाखाकाअनुसार आइतबार बिहान बाँकेको नेपालगन्ज, दाङको घोराही, रुपन्देहीको भैरहवा र आसपासका क्षेत्रमा हुस्सु÷कुहिरो लागेको थियो । काठमाण्डौ उपत्यका तथा बाराको सिमरा र आसपासका क्षेत्रमा पनि हुस्सु÷कुहिरो फैलिएको छ ।
आइतबार बिहानको हुस्सु÷कुहिरो घाम लागेसँगै दिउँसोपछि हट्दै जाने मौसमविद्ले बताएका छन् । साथै पहाडी र हिमाली धेरै ठाउँमा आइतबार बिहानैदेखि घाम लागेको छ ।शनिबार बेलुकादेखि ‘अर्नब’ चक्रवातको प्रभाव हटेसँगै मौसममा क्रमिक सुधार हुन थालेको हो । आइतबारराति मकवानपुरको रजैया मौसम मापन केन्द्रमा सबै भन्दा धेरै १०.२ मिलिमिटर पानी परेको छ । अरु थोरै ठाउँमा हल्का पानी परेको छ ।
बङ्गालको खाडीमा विकसित ‘अनर्ब’ चक्रवातको प्रभावले बिहीबारदेखि निरन्तर वर्षा र हिमपात भएको थियो । यो अवधिमा धानबाली काट्ने, भित्र्याउने, पदयात्रा तथा अन्य गतिविधि प्रभावित भएका थिए ।
मौसम पूर्वानुमान महाशाखाका मौसमविद् सञ्जीव अधिकारीकाअनुसार मौसम सुधार भएसँगै आज सोमबारदेखि धानबाली काट्ने, भित्र्याउनेलगायतका अन्य गतिविधि गर्न सकिनेछ ।
महाशाखाका अनुसार हिजो दिउँसो देशभर आंशिक बादल लागेको थियो । हिमाली र पहाडी एक÷दुई ठाउँमा हल्का वर्षा तथा हिमपातको भएको थियो । वर्षासँगै देशका धेरै ठाउँमा चिसो बढेको छ ।
