बुटवल । प्राइम कमर्सियल बैंक लिमिटेडले आफ्नो स्थापनाको २०औँ वर्ष प्रवेशको अवसरमा बुटवल प्रदेश कार्यालयमा बुधवार रक्तदान कार्यक्रम गरेको छ।
‘रक्तदान महादान’ भन्ने सन्देशसहित आयोजना गरिएको कार्यक्रममा पछिल्लो समय रसुवा–भोटेकोशी क्षेत्रमा आएको बाढीबाट प्रभावित तथा घाइते भएकाहरूलाई आवश्यक पर्ने रगतमा सहयोग पुगोस् भन्ने उद्देश्य रक्तदान कार्यक्रम गरेको बैंकका प्रदेश प्रमुख कुश सुदन सिंहले बताउनुभयो।
कार्यक्रममा बैंकका कर्मचारी, सेवाग्राही तथा शुभेच्छुकहरूले उत्साहपूर्वक रक्तदान गरेका थिए। नेपाल रेडक्रस सोसाइटी रक्तसञ्चार केन्द्र, बुटवलको प्राविधिक सहयोगमा सम्पन्न कार्यक्रममा ६४ युनिट रगत संकलन भएको बैंकले जनाएको छ।
स्थापना दिवसको अवसरमा बैंकले सामाजिक उत्तरदायित्वअन्तर्गत विभिन्न रचनात्मक तथा सामाजिक कार्यक्रम गर्दै आएको प्रदेश प्रमुख सिंहले बताउनुभयो।
यसै अवसरमा बैंकको प्रदेश कार्यालय बुटवलमा केक काटेर शुभकामना आदान–प्रदानसमेत गरिएको थियो। कार्यक्रममा प्रदेश प्रमुख सिंहसहित बैंकका विभिन्न शाखाका शाखा प्रबन्धक तथा कर्मचारीहरूको उपस्थिति रहेको थियो।
